इलाम । इलाम नगरपालिकामा संचालित गरिवि निवारणका लागि लघु उद्यम विकास कार्यक्रम एक वर्षका लागि वडा नम्बर नौ मा संचालन हुने भएको छ । आइतबार वडामा आयोजित अभिमुखिकरण कार्यक्रममा वडाध्यक्ष गोपाल चौहानले वडामा रहेका इच्छुक युवा उद्यमीलाई कार्यक्रम मार्फत तालिम दिइने जानकारी दिएका छन् । चौहानले वडाको विकासका लागि कार्यक्रम प्रभावकारी बन्ने विश्वास व्यक्त गरे । कार्यक्रम मार्फत तीस जनालाई तीन वटा विभिन्न उद्यमशीलता तालिम दिइने कार्यक्रम अधिकृत सविता धितालले जानकारी दिइन् । यसतै सहजकर्ता गणेश केसीले लामो अवधिका लागि ४५ देखि ९० दिने र छोटो अवधिको लागि पाँच देखि १५ दिनसम्म तालिम दिइने जानकारी दिए । कार्यक्रम संचालनका लागि ९ लाख २० हजार बजेट विनियोजन भएको छ । अभिमुखिकरण कार्यक्रममा वडाका सदस्य सहित ७५ जनाको सहभागिता रहेका थियो ।
नवनिर्वाचित पदाधिकारीको स्वागत कार्यक्रम सम्पन्न
इलाम । राष्ट्रिय कृषक समूह महासंघ नेपाल इलाम शाखाले सोमबार कोशी प्रदेश कार्यसमितिका नवनिर्वाचित पदाधिकारी र प्रतिनीधिहरुको स्वागत कार्यक्रम आयोजना गरेको छ । इलाम नगरपालिकामा आयोजना गरिएको कार्यक्रममा इलाम नगरपालिकाका उपमेयर विष्णु दाहालले कृषक महासंघले उठाएका सवालको कार्यान्वयनमा नगरपालिका प्रतिवद्ध रहेको जानकारी दिइन् ।
सभामा महासंघकी कोशी प्रदेश अध्यक्ष कुसुम दाहालले किसानका लागि सवै तहका सरकारको नीति नियम फितलो रहेको र यसका लागि महासंघले ध्यानाकर्षण गराएको बताइन् । महासंघ इलाम शाखाका संयोजक राम मगरको अध्यक्षतामा भएको कार्यक्रममा केन्द्रिय सदस्य विनोद देवान , नगरको पशु शाखा प्रमुख रुपमान लिम्बु, कृषि ज्ञान केन्द्र इलामका नि प्रमुख रामजुगन यादव सहितका वक्ताले शुभकामना व्यक्त गरेका थिए । कार्यक्रममा तोया भट्टराईले हालसम्म स्थानीय तहहरुले कृषि कानुन बनाउन पनि आलटाल गरिरहेको बताए । इलाममा सन्दकपुर गाउँपालिका बाहेक कुनै पनि स्थानीय तहमा कृषि कानुन निर्माण नभएको बताए । कार्यक्रममा महासंघका तर्फबाट ३९ बुँधे ध्यानाकर्षण पत्र इलाम नगरपालिकालाई दिइएको थियो ।
