इलाम । इलामको क्षेत्र नं २ मा ५ सय ४७ मतदाता थपिएका छन । इलामको निर्वाचन क्षेत्र २ मा वैशाख १५ मा हुने उपनिर्वाचनका मतदाताको संख्या एक लाख १५ हजार आठ सय ८९ हुने भएको छ ।
वैशाख १४ सम्ममा १८ वर्ष पुग्ने व्यक्तिले मतदान गर्न पाउने भएपछि अबको पुरुष मतदाता संख्या ५९ हजार १८ र महिलाको संख्या ५६ हजार आठ सय ६९ हुने भएको निर्वाचन आयोगले जनाएको छ ।
क्षेत्र २ मा पाँच पालिकाका ४२ वटा वडा पर्छन् । इलाम नगरपालिकाका १२ वटा वडामध्ये १० बाहेक सबै क्षेत्र २ मा पर्छन् । यी वडाको कुल मतदाता संख्या ३४ हजार ४५ छ ।
देउमाई नगरमा २६ हजार तीन सय ६५, चुलाचुलीमा १८ हजार पाँच सय ४५, फाकफोकथुममा १६ हजार तीन सय दुई, माङ्सेबुुङमा १२ हजार पाँच सय ३६ र माई नगरका वडा ६, ७, ८ मा आठ हजार ९६ मतदाता रहेको आयोगको तथ्यांकमा उल्लेख छ । २०७९ सालको निर्वाचनमा यो क्षेत्रमा एक लाख १५ हजार तीन सय ४२ मतदाता थिए ।
क्षेत्र २ मा अहिले ७९ मतदानस्थलमा एक सय ४९ मतदान केन्द्र छन् । सुरक्षा निकायले सबै मतदानस्थललाई ‘अति संवेदनशील’ भनेको छ । प्रतिनिधिसभा सदस्य उपनिर्वाचन हुनलागेको देशभरको एउटैमात्र निर्वाचन क्षेत्र भएकाले यहाँका सबै मतदानस्थल अति संवेदनशीलको सूचीमा राखिएको हो ।
‘यहाँमात्रै उपनिर्वाचन हुँदा देशभरको ध्यान एकैठाउँमा केन्द्रित छ,’ सिडिओ इन्द्रदेव यादवले भने, ‘बाहिरबाटसमेत आउ–जाउ बढी हुनसक्ने भएकाले सबै मतदानस्थल सुरक्षाका दृष्टिले अति संवेदनशील छन् ।’
गत भदौ २६ मा यो क्षेत्रका प्रतिनिधिसभा सदस्य सुवासचन्द्र नेम्बाङको निधन भएपछि उपनिर्वाचन हुन लागेको हो । उपनिर्वाचनका लागि १२ दल र सात उम्मेदवार चुनावी मैदानमा छन् ।
