इटहरी । प्रदेश १ का मुख्यमन्त्री भीम आचार्यले प्रदेशसभामा आज विश्वासको मत लिंदैछन । विश्वासको मतकालागि मुख्यमन्त्री आचार्यले का लागि प्रस्ताव पेश गरेकामा आज विश्वासको मत लिने कार्यतालिका रहेको हो । विराटनगरस्थित प्रदेश सभाहलमा बसेको प्रदेशसभाको बैठकमा मुख्यमन्त्री आचार्यले विश्वासको मतका लागि प्रस्ताव पेश गरेका थिए ।
विश्वासको मतमा आज ७ गते दिउँसो साढे १२ बजेदेखि छलफल र मतदान हुने गरी प्रदेशसभाको बैठक स्थगित गरिएको छ । मुख्यमन्त्री आचार्यले विश्वासको मतका लागि असोज २५ गते प्रदेशसभामा प्रस्ताव दर्ता गराएका थिए ।
भदौ ९ मा एमाले विभाजित भएको भोलिपल्ट गठित सरकारले दल विभाजनको ३० दिनभित्र संसद्बाट विश्वासको मत लिनुपर्ने थियो । तर, संवैधानिक प्रावधानको आफू अनुकूल व्याख्या गर्दै सरकारले आफ्नो आयु लम्ब्याउने प्रयास गरिरहेको प्रतिपक्षी दलहरूको आरोप छ ।
प्रदेशसभामा सत्तारूढ एमालेका ४१ सांसद छन् । एकजना सभामुख र एक जना फरार सांसद घटाउँदा उसको मत संख्या ३९ हुन्छ । यो संख्या सरकार टिकाउन पर्याप्त संख्या भने होइन । आज हुने मतदानमा आचार्यको पक्षमा ‘फ्लोर क्रस’ को सम्भावनालाई रोक्न सके नयाँ सरकार बन्ने निश्चित देखिन्छ ।
संसद्मा स्पष्ट बहुमत सिद्ध गर्न ४७ मत आवश्यक रहेको छ । प्रतिपक्षी गठबन्धन भने ५० मत संख्या साथमा लिएर नयाँ सरकार बनाउन तयारी अवस्थामा रहेको छ ।
विपक्षी गठबन्धनमा कांग्रेसका २१, माओवादी केन्द्रका १५, नेकपा एकीकृत समाजवादीका १०, जसपाका तीन र संघीय लोकतान्त्रिक मञ्चका एक गरी ५० सांसद छन् ।
