– सुन्दरकुमार थकाली
मुस्ताङ । हिमाली जिल्ला मुस्ताङको घरपझोङ गाउँपालिकाअन्तर्गतका पाँचवटै वडा जोड्ने रिङरोड सडक स्तरोन्नति अहिले धमाधम सुरू भएको छ । गण्डकी प्रदेश सरकारको ‘एक निर्वाचन क्षेत्र एक रणनीतिक महत्वको सडक’ अन्तर्गत उपल्लो मुस्ताङको लोमान्थाङ र तल्लो मुस्ताङको घरपझोङ गाउँपालिकाका दुईवटा रिङरोड सडक स्तरोन्नति भइरहेको छ ।
मुस्ताङको जोमसोमदेखि धार्मिक, सांस्कृतिक, कृषि र पर्यटकीय सम्भावना बोकेको ठिनी, ढुम्बाताल, छैरो, चिमाङ, मार्फा स्याङ गरी पाँच गाउँलाई जोड्ने ११ किलोमिटर सडक स्तरोन्नति भइरहेको छ ।
सम्झौता अवधि दुई वर्ष रहेको घरपझोङ रिङरोड सडक स्तरोन्नति २६ असार २०७६ देखि सुरू गरिएको थियो । घरपझोङ रिङरोडको सम्झौता अवधि गत २६ असारमा सकिँदा भौतिक प्रगति २५ प्रतिशतमात्र भएको पूर्वाधार विकास कार्यालय मुस्ताङले जनाएको छ ।
कार्यालयकाअनुसार बहुवर्षीय सडक आयोजनाअन्तर्गत घरपझोङ रिङरोड सडकको कुल लागत २१ करोड ४३ लाख रुपैयाँ रहेको छ । रिङरोडको पाँच किलोमिटरका दूरी ढुम्बातालसम्म कालोपत्रे गर्ने योजना रहेको पूर्वाधार विकास कार्यालय मुस्ताङका सूचना अधिकारी रवीन चोख्यालले जानकारी दिए ।
पूर्वाधार विकास कार्यालय मुस्ताङले चालू आर्थिक वर्षभित्रै सडक निर्माण सम्पन्न गर्ने लक्ष्यसहित निर्माण कम्पनीलाई कार्यक्षेत्रमा परिचालन गरिएको उल्लेख गरेको छ । घरपझोङ रिङरोड सडकको सम्झौता अवधि सकिएकाले कार्यालयले म्याद थपको प्रक्रिया अघि बढाउन गत २५ असारमा प्रदेश सरकारलाई प्रस्ताव पेस गरेको छ ।
चालू आवमा प्रदेश सरकारबाट घरपझोङ रिङरोडका लागि तीन करोड २५ लाख रुपैयाँ विनियोजन भएको र नपुग थप बजेट प्रदेश सरकारसँग माग गरिएको पूर्वाधार विकास कार्यालयको भनाइ छ । घरपझोङ रिङरोड सडक स्तरोन्नतिको काम जलजला निर्माण सेवाले लिएको हो ।
गण्डकी प्रदेश सरकारको बहुवर्षीय योजनाअन्तर्गत सुरुवाती आर्थिक वर्ष २०७६/७७ सालमा पाँच करोड रुपैयाँ विनियोजन गरिएको थियो। सो आर्थिक वर्ष कोरोना महामारीका कारण रिङरोड सडकको पाँच करोडमध्ये तीन करोड १४ लाख बजेट काम हुन नसकी फ्रिज भएको थियो ।
यस्तै, कोरोना कहरको दोश्रो आर्थिक वर्षमा भने रिङरोड सडकको शतप्रतिशत काम सम्पन्न भएको छ । सो वर्ष प्रदेश सरकारमार्फत विनियोजित तीन करोड ८० लाख बजेटमध्ये तीन करोड ७६ लाख खर्च भएको पूर्वाधार विकास कार्यालय मुस्ताङले जनाएको छ ।
घरपझोङ रिङरोड कन्स्ट्रक्सनका साइड इञ्चार्ज भुपराज खनालले सुरुवाती चरणको पहिलो वर्षमा कोरोना कहरको कारण काम हुन नसकेको बताए । उनले दोस्रो वर्ष सडक स्तरोन्नतिको काम भएको र बाँकी काम कन्ट्रक्सनले चालू आवभित्रै सक्ने गरी जनशक्ति र उपकरण कार्यक्षेत्रमा खटाइएको बताए ।
मुस्ताङको घरपझोङ रिङरोड सडक स्तरोन्नति सुरू गरिनुअघि साविक जिल्ला विकास समितिले जोमसोम, ठिनी, ढुम्बातालसम्म कच्ची सडक विस्तार गरेको थियो । सोही सडकलाई स्तरोन्नति गर्दै सडक चौडा गर्ने, ग्रेड मिलान गर्ने र सडक बेसका लागि ग्याबिन वाल लगाउनेलगायतको काम भइरहेको छ ।
यस्तै रिङरोड सडकअन्तर्गत निर्माण कम्पनीले ६ किमी सडकमा नयाँ ट्रयाक खोल्ने काम गरिरहेको छ । जसअन्तर्गत घरपझोङ मार्फाको कालीगण्डकी पारीको भिरालो सतहमा करिब दुई सय मिटर रक कटिङ गरी सडक ट्रयाक खोल्न बाँकी रहेको जनाइएको छ । 
