विराटनगर । कोशी प्रदेशको प्रदेश सभाको सचिवालयले विज्ञप्ति जारी गर्दै समय विशेष कारणवश बैठक बस्न नसक्दा बैठक शुक्रबार विहान ११ बजेसम्मका लागि स्थागित गरिएको जनाएको छ ।
प्रदेश सभाको तेस्रो अधिवेशनको प्रथम बैठकपछि ३० मिनेटको स्थगन समय र त्यसपछि सचिवालयले राती ८ बजेको लागि बैठक आव्हान गरेको थियो । प्रथम बैठक सकेर ३० मिनेटको स्थगन समयमा मुख्यमन्त्री हिक्मतकुमार कार्की प्रदेश सभाबाट बाहिरिएका थिए। मुख्यमन्त्री कार्की त्यसपछि प्रदेश सभामा अनुपस्थित रहदाँ बैठकले निरन्तरता पाउन नसकेको हो ।
पहिलो बैठकमा मुख्यमन्त्री कार्कीले सरकारलाई विश्वासको मतको लागि प्रस्ताव गरेका थिए । उनको प्रस्तावमा राप्रपाले मात्र साथ दिएको थियो। प्रतिपक्षी दल नेपाली काँग्रेस, नेकपा माओवादी केन्द्र र एकीकृत समाजवादी पार्टीले विश्वासको मत दिन नसक्ने जनाउँदै मुख्यमन्त्री कार्कीलाई राजीनामा दिन आव्हान गरे । जसपा तटस्थ रहेको थियो। त्यसपछि, मुख्यमन्त्री कार्की सदनबाट बाहिरिएका थिए ।
नेपाली काँग्रेस संसदीय दलका प्रमुख सचेतक भूपेन्द्र राईका अनुसार मुख्यमन्त्री प्रदेश सभालाई फेस गर्न नसक्नुनै सरकारबाट बाहिरिएको अवस्था हो। प्रदेश सभामा मुख्यमन्त्रीलाई पर्खिरहेको बताएका प्रमुख सचेतक राईले भने, हामी मुख्यमन्त्री ज्यूलाई पर्खिरहेका छौँ। उहाँ पहिलो सत्र सकेर निस्कनु भएको अहिलेसम्म आउन सक्नुभएको छैन्। अब संभवतः बैठक भोलिका लागि सरेको छ। त्यसपछि मत विभाजन प्रक्रिया अघि बढ्नेछ।
यसक्रममा दलका नेताहरु सभामुख बाबुराम गौतमसंग छलफल गरेका थिए। प्रदेश सभा सचिवालयका एक कर्मचारीका अनुसार राति बैठक बस्न नसकेको खण्डमा भोली शुक्रबारका लागि समय तोकिने र सो समय मुख्यमन्त्रीलाई जवाफको लागि समय दिने र प्रक्रियागत रुपमा सभा मत विभाजनतर्फ अघि बढ्नेछ।
