इटहरी । नेपाली भाषा साहित्यका आदिकवि भानुभक्त आचार्यको २१० औं जन्मजयन्तीको अवसरमा इटहरी ६ मा रहेको मोडर्न प्रिपरेटोरी सेकेण्डरी बोर्डिङ स्कूलका बालबालिकाहरु कविता प्रतियोगिताको आयोजना गरि मनाएका छन् ।
भानु जयन्तीको पूर्वसन्ध्यामा बिद्यालयमा रहेको ‘आर्ट एण्ड लिटरेचर क्लब’ (कला र साहित्य क्लब)ले भानु जयन्ति विशेष कविता प्रतियोगिताको आयोजना गरेको हो ।
बिद्यालयका बिद्यार्थीहरु आफैले संचालन गर्ने उक्त ‘आर्ट एण्ड लिटरेचर क्लब’को आयोजना भएको उक्त कविता प्रतियोगितामा प्राथमिक तहदेखि माध्यमिक तहसम्मका प्रतियोगी र अप्रतियोगी गरी ३० जना बढी विद्यार्थीहरुले आ-आफ्नो कविता प्रस्तुत गरेका थिए । उक्त कार्यक्रममा विद्यालयका शिक्षकहरुले समेत आ-आफ्नो कविता प्रस्तुत गरेका थिए ।
विद्यार्थीहरूलाई सृजनशील बनाउन उत्प्रेरित गर्ने उदेश्यले उक्त कार्यक्रमको आयोजना गरिएको बिद्यालयका प्रधानाध्यापक मणिकुमार पौडेलले बताए ।
प्रधानाध्यापक पौडेलले भने, ‘हामीले स–साना विद्यार्थीहरूलाई पनि सृजनशील बनाउनका निम्ति यस्ता कार्यक्रमको आयोजना गर्दै आएका छौँ । यस्ता प्रतियोगिताले विद्यार्थीलाई सृजनशील बन्नसँगै अगाडि गएर बोल्न पनि सिकाउने भएकाले हामीले भानु जयन्तीको अवसर पारेर यो किसिमको कार्यक्रम गरेका छौँ ।’
‘पढाइ सँगै विद्यार्थीलाई ज्ञान र सीप आवश्यक हुन्छ । विद्यार्थीको सर्वाङ्गिण विकास गराउने शिक्षक-अभिभावक हुन् । बालबालिकामा रहको क्षमता प्रस्फुटन गर्न वातावरणको धेरै ठुलो भूमिका हुन्छ । त्यसका लागि विद्यालयले काम गरिरहेको छ ।’ प्रधानध्यापक पौडेलले भने ।
कार्यक्रममा कवि एवं पत्रकार विवेक विवस रेग्मीले कविताले बाल मस्तिस्कमा सकारात्मक प्रभाव पार्ने बताउँदै बालबालिकामा उत्साह, अनुभव, सहभागिता र अभिव्यक्ति जस्ता महत्वपूर्ण सकारात्मक मनोवैज्ञानिक असरहरू हुने बताए ।
‘केटाकेटी’ शीर्षकको कविता वाचन गरेका रेग्मीले यस्ता कार्यक्रमहरुले निरन्तरता पाउँनुपर्ने बताए । उनले भने, ‘कविताले विचारहरूलाई विस्तार गर्ने र एक साथै विभिन्न धारणाहरू, भावनाहरू, रचनात्मकताहरूको मिश्रण प्रस्तुत गर्दछ । यसले बाल मस्तिस्कलाई नयाँ धारणा, बिचारहरूलाई विकास गर्ने सहयोग गर्दछ।’
विद्यालय संचालक समितिका अध्यक्ष सञ्जीव वाग्लेले विद्यार्थीहरूको क्षमता अभिवृद्वि गर्न विद्यार्थीकै सक्रिय सहभागितामा बिद्यालयमा नियमित कार्यक्रमको आयोजना गर्ने गरिएको बताए ।
विद्यार्थीहरूलाई विभिन्न समयमा अतिरिक्त क्रियाकलापमा सहभागी गराउँदा उनीहरूको क्षमता वृद्विसँगै प्रतिभा प्रस्फुटन हुँने वाग्ले बताउँछन् ।
कक्षागत र विषयगत सिकाईबाहेक पनि विद्यालयले रचनात्मक काममा पनि विद्यार्थीहरूलाई सहभागी गराउँदै आएको बताउँदै अध्यक्ष वाग्लेले भने, ‘कविताले जीवनको वास्तविकतालाई एक नयाँ आयाम दिने गर्दछ र यसले बालबालिकाको मन, मस्तिस्क र भावनाहरूमा सकारात्मक असरहरू पार्छ।’
उनका अनुसार प्रतियोगितामा विद्यार्थीहरूले कविता सुनाएका थिए भने शिक्षक, शिक्षिकाहरूले पनि उत्तिकै सक्रिय सहभागी जनाएर कविता सुनाएका थिए ।
बिद्यालयमा मोडर्न बाल क्लब, आर्ट एण्ड लिटरेचर क्लब, ट्राभल एण्ड टुरिजम क्लब, इन्भारोमेंट एण्ड स्यानिटेसन क्लब, सोसल वेलफेयर क्लब, स्काउट र रेडक्रसमा आवद्द विद्यार्थीहरुले समय समयमा बिभिन्न नियमितरुपमा कार्यक्रमहरु आयोजना गर्ने गरेको प्रधानाध्यापक पौडेलले जानकारी दिए ।
उक्त प्रतियोगितामा प्रथम कक्षा ६ मा अध्यनरत छात्रा रूस्मिता खत्री प्रथम, कक्षा १० का छात्र रेहान्त कार्की दोश्रो र कक्षा १० मा अध्यनरत छात्र उज्ज्वल निरौला तेश्रो भएका थिए । कार्यक्रममा विद्यालयका सञ्चालक, शिक्षक-शिक्षिका र विद्यार्थीहरुको उपस्थिति रहेको थियो ।
