इनरुवा । नेपाली कांग्रेसका नेता एवम् पूर्वमन्त्री ज्ञानेन्द्र बहादुर कार्कीले कोशी प्रदेशमा नेपाली कांग्रेस नेतृत्त्वको सरकार निरन्तरता पाउने बताएका छन् ।
प्रदेशका नव नियुक्त मुख्यमन्त्री उद्धव थापाले विश्वास मत पाउने दावी गर्दै नेता कार्कीले कोशी प्रदेशबाट कांग्रेसले विकासको नेतृत्व गर्ने दावी गरेका हुन् ।
सभामुखले प्रदेशसभा सदस्यको हिसाबमा समर्थन गरेको बताउँदै कार्कीले सभामुखले समर्थन गरेको विषयलाई विवादमा ल्याउन नमिल्ने दावी गरेका छन् । उनले भने, ‘सभामुखलाई विवादमा ल्याउनु आवश्यक छैन ।’
नेपाली कांग्रेस सुनसरी क्षेत्र नम्बर ४ मा बहेको क्षेत्रीय सम्मेलनलाई सम्बोधन गर्दै कार्कीले भाषणले मात्र सुशासन नआउने बताए ।
आफुले जनतासँग गरेका वाचा पुरा गर्दै गएको बताउँदै उनले भने, ‘भाषण गरेर मात्र सुशासन आउँदैन । सुशासन आउनका लागि काम गर्नु पर्छ । मैले जनतासँग गरेका बाचा पुरा हुँदै गएका छन् ।’
कोशी गाउँपालिकाको लौकहिमा भएको उक्त कार्यक्रममा कार्कीले टाउनहल बनाउने देखि सडक र मन्दिर बनाउने काम तीव्रताका साथ भएको भन्दै जनाभावना अनुरुप काम गर्दै जाने बताए । उनले अगाडी भने, ‘इनरुवा देखि कौवाखोच जोड्ने सडक यही आर्थिक वर्षमा स्तरोन्नति हुने छ ।’
निर्वाचन सम्बन्धि एक प्रसंगमा बोल्दै पूर्व मन्त्री कार्कीले ‘हार्दिकता र एकता कायम हुन नसक्दा निर्वाचन चुनौतीपूर्ण बन्दै गरेको’ बताएका छन् ।
उनले अगाडी भने, ‘हामी पार्टी भित्र आन्तरिक एकता चाहन्छौँ तर कसैले एक हुन दिँदैनन । सबै समुदाय र वर्ग बिचमा एकता ल्याउन जरुरी छ । एउटा पुस्ता सङ्घर्षमा बित्यो अर्को पुस्तामा परिवर्तनको हुटहुटी छ । विकास र परिवर्तनको अभियानमा लाग्नु अबको आवश्यकता हो ।’
उक्त क्षेत्रबाट संघीय सांसद रहेका नेका केन्द्रीय सदस्य कार्कीको प्रमुख आतिथ्यतामा भएको उक्त कार्यक्रममा नेपाली कांग्रेसका अर्का केन्द्रीय सदस्य एवं राजीव कोइराला, प्रदेशसभा सदस्यहरु सदानन्द मण्डल, हाजी इसरायल मन्सुरी लगायत कांग्रेस नेता कार्यकर्ताहरुको उपस्थिति रहेको थियो ।
