विराटनगर । विराटनगरमा एक महिलाको रहस्यमय ढङ्गले मृत्यु भएको फेला परेको छ ।
मृत्यु हुनेमा विराटनगर महानगरपालिका १२ स्थित गराहा टोल बस्ने २१ वर्षीया सुष्मा राय रहेको जिल्ला प्रहरी कार्यालय मोरङले जनाएको छ । प्रहरीका अनुसार आज बिहान दुई बजे रायको शव फेला परेको हो ।
यता, मृतक महिलाका माइती पक्षले भने पतिको कुटाइबाट सुष्माको ज्यान गएको आरोप लगाउँदै कारबाहीको माग गरेका छन् । चार वर्षअघि प्रेम विवाह गरेका २३ वर्षीय सुरज शर्माले कुटपिट गरी सुष्माको हत्या गरेको उनीहरूको आरोप छ ।
आरोपित शर्माले भने हत्याको आरोप अस्वीकार गर्दै सुष्माले आत्महत्या गरेको दाबी गरेका छन् । सुष्माको माइती घर विराटनगर १२ सैनिक टोलमा रहेको छ । उनीहरूको ३ वर्षको छोरी र ६ महिनाको छोरा रहेको छ ।
शनिबार दिउँसो पतिसँग झगडा भएपछि सुष्मा माइती पुगेकोमा परिवारले सम्झाई(बुझाई घर पठाइदिएको थियो । घर पुगेको २४ घण्टा पनि नबित्दै छोरीको मृत्यु भएको र आत्महत्या प्रयास गरेको अवस्थामा अस्पताल नपठाएको हुँदा घरकै सदस्यले हत्या गरेको हुनसक्ने आशङ्का माइती पक्षले गरेको छ ।
घटनाबारे जानकारी पाएलगत्तै परिचालित प्रहरीले शव पोस्टमार्टमका लागि कोसी अञ्चल अस्पताल पठाई घटनाको अनुसन्धान सुरु गरेको जिल्ला प्रहरी कार्यालय मोरङका प्रमुख प्रहरी उपरीक्षक (एसपी) दीपक पोखरेलले बताए ।
