धरान, ६ असार । वीपी कोइराला स्वास्थ्य विज्ञान प्रतिष्ठान धरानका फ्याल्टी वेल्फेयर सोसाइटीका अध्यक्षलाई स्पष्टीकरण सोधिए पछि आन्दोलित भएका चिकित्सक तथा विद्यार्थीहरुले आज पनि आन्दोलनलाई निरन्तरता दिएका छन्।
प्रतिष्ठानमा पदाधिकारीहरुले गरेको अनियमितताको विषयमा अख्तियार दुरुपयोग अनुसन्धान आयोगका प्रमुख आयुक्तलाई एसएमएस गरेका डा.विष्णु पोख्रेललेलाई प्रतिष्ठानका उपकुलपति डा. ज्ञानेन्द्र गिरीले स्पष्टीकरण सोधेपछि आन्दोलित भएका चिकित्सक तथा विद्यार्थीहरुले आइतवार पनि अनियमितता र भ्रस्टाचार विरुद्दको आन्दोलनलाई निरन्तरता दिएका हुन्।
गत आईतवारबाट आन्दोलित भएका चिकित्सक तथा विद्यार्थीहरुले एकसाता भईसक्दा समेत आफ्ना मागहरु पुरा नभएको भन्दै अझ सशक्त आन्दोलनको तयारी गरेको फ्याल्कटी वेल्फेयर सोसाइटीका अध्यक्ष डा. विष्णु पोख्रेलले बताएका छन्।
हरेक दिन आठ देखि दश बजे सम्म गरेको आन्दोलनले पदाधिकारीहरुले दवाब महसुस नगरेको बताउँदै पोखरेलले भने, ‘सोमवारबाट सुरक्षा घेरा तोड्दै सशक्त आन्दोलनमा सम्पूर्ण प्रतिष्ठान उत्रिने छ।’
प्रतिष्ठान अथोरिटीलाई जानकारी दिएरै सुरक्षा घेराबाट आन्दोलन सडकमा पुग्ने बताउँदै डा. पोखरेलले प्रतिष्ठान जोगाउन सशक्त आन्दोलनको विकल्प नभएको जिकिर गरे। उनले भने, ‘सम्पूर्ण वीपी प्रतिष्ठानलाई भोलिको आन्दोनलमा उत्रिन आह्वान गर्छौं।’
प्रतिष्ठानको अनियमितताबारे अख्तियार दुरुपयोग अनुसन्धान आयोगका प्रमुख आयुक्तलाई एसएमएस गरेका उनले भने, ‘प्रतिष्ठानमा भएको अनियमितता र भ्रस्टाचारको छानविन वीपी कोइराला प्रतिष्ठानलाई अब शुद्धिकरण अभियान राष्ट्रियकरण भइसक्यो अब कसैले रोक्न चहेर पनि रोक्न सक्दैन। सबैले यसमा सहभागीता जनाउनुको बिकल्प छैन।’
आन्दोलनमा सहभागी चिकित्सकहरुले पदाधिकारीहरुले आफ्ना माग सम्बोधन गर्न बेवास्ता गरेको भन्दै सोमवारबाट अझै ठुलो संख्यामा सशक्त सशक्त रुपमा सडक आन्दोलनमा उत्रिने चेतावनी समेत दिएका छन्।
त्यसैगरि, चिकित्सक र विद्यार्थीको मागको विषयमा प्रतिष्ठानका पदाधिकारीहरुसँग जिज्ञासा राख्दा नाम उल्लेख नगर्ने सर्तमा एक पदाधिकारीले भने, ‘प्रतिष्ठानमा स्पष्टीकरण सोधिने विषय सामान्य हो। हिजो पनि सोधिएका हुन्, भोलिपनि सोधिने छन्। मुख्यकुरा स्पष्टीकरणको विषय भन्दापनि आदोलन सुरु हुँदाको विषय र माग विषयान्तर भएको छ।’
आन्दोलनमा चिकित्सक र कर्मचारीहरुको आ-आफ्नो व्यक्तिगत स्वार्थ रहेकाले आन्दोनल विषयान्तर भएको उनले दावी गरे।
उनले भने, ‘आन्दोलनकारीले प्रतिष्ठानको हित भन्दा पनि राजनीतिक र व्यक्तिगत अभिष्ट पुरागर्ने रणनीति देखिन्छ। डाक्टर र कर्मचारीहरु आ-आफ्नो अभिष्ट पुरा गर्ने दाउमा छन्। संस्थाको हित गौण देखिएको छ।’
