काठमाडौं । जलवायु परिवर्तनसम्बन्धी राष्ट्रसंघीय सम्मेलन कोप २६ मा सहभागि हुन प्रधानमन्त्री शेरबहादुर देउवा आज बेलायत प्रस्थान गर्दै हुनुहुन्छ । प्रधानमन्त्रीको उच्चस्तरिय भ्रमण टोली २० सदस्यको हुनेछ, जसमा ६ जना सचिव छन् ।
स्कटल्याण्डको ग्लास्गोमा हुने कोप २६ सम्मेलन सोमबारदेखि सुरु हुँदैछ । त्यसअघि प्रधानमन्त्री देउवा लण्डनमा नेपाली समुदायका कार्यक्रम तथा अन्य विभिन्न कुटनीतिक भेटघाटमा व्यस्त रहुनेछन् ।
भ्रमणका क्रममा देउवाले भोलि नेपालका लागि सर्वदलीय संसदीय समूह र बेलायत–नेपाल व्यापार तथा लगानी मञ्चले लण्डनमा आयोजना गर्ने स्वागत कार्यक्रममा सहभागी हुनेछन् ।
आइतबार प्रधानमन्त्री देउवाको सम्मानमा लण्डनस्थित नेपाली दूतावासले स्वागत समारोह आयोजना गर्दैछ । उनले भूतपूर्व गोर्खा संगठनका प्रतिनिधि, बेलायती संसद्का सदस्य र अन्य नेपाली प्रवासी सदस्यसँग भेटघाट गर्नुहुने छ ।
प्रधानमन्त्री देउवा कार्तिक १५ गते सोमबार कोप–२६ को औपचारिक उद्घाटन समारोहमा सहभागी हुने कार्यक्रम रहेको छ ।
