विराटनगर । एक बालिकालाई आफ्नै शिक्षकले गरेको यौन दुर्व्यवहारको विरोधका क्रममा हिंसा भड्किदा एक महिला प्रहरीको मृत्यु भएको छ ।
मोरङको लेटाङ–५ खेरुवास्थित शिक्षा बिकास माध्यमिक विद्यालयमा अध्ययनरत एक छात्रा माथि शिक्षकले यौन दुर्व्यवहारको प्रयास गरेको विरोधमा प्रदर्शनमा उत्रिएका विद्यार्थी, अभिभावक र प्रहरीबीच झडप हुँदा महिला प्रहरीे उर्मिला श्रेष्ठकाे मृत्यु भएको हो ।
स्थानीय प्रत्यक्षदर्शीका अनुसार लेटाङ बजारको मनकामना अस्पतालमा उपचारका क्रममा प्रहरी श्रेष्ठको मृत्यु भएको छ । उक्त झडपमा परि थप केहि व्यक्तिको ज्यान गएको सूचना नीतिसञ्चारले प्राप्त गरेको छ । तर, उक्त सूचनाको स्वतन्त्र पुष्टि हुन सकेको छैन ।
यस विषयमा लेटाङ्ग प्रहरीले यस विषयमा आधिकारीक जवाफ दिन नसकिने बताउँदै जिल्लामा सम्पर्क राख्न आग्रह गरेकोमा जिल्ला प्रहरीले समेत आधिकारिक विवरण आउँन बाँकी रहेको बतायो ।
प्रहरीले आरोपित शिक्षक मनोज पौडेललाई इलाका प्रहरी कार्यालय लेटाङ्गको हिरासतमा राखेको छ ।
पौडेललाई घटनास्थलबाट बाहिर निकाल्ने क्रममा स्थानीयले प्रहरी माथि ढुङ्गा मुढा प्रहार गरेर आक्रमण गरेका थिए । सो क्रममा केही प्रदर्शनकारीहरु र एसपी सहित अठार जना प्रहरी घाइते भएको बताईएको छ ।
के थियो घटना ?
लेटाङ ५ को शिक्षा विकास माविमा अध्ययनरत कक्षा ६ मा पढ्ने १२ वर्षीय बालिकालाई सोही विद्यालयका एक शिक्षक मनोज पौडेलले जबरजस्ती करणीको प्रयास गरेको घटना सार्वजनिक भएपछि विद्यार्थी र अभिभावक आक्रोशित भएको बताईएको छ ।
उक्त घटना सार्वजनिक भएपछि आक्रोशित विद्यार्थी र अभिभावकहरुले शिक्षक पौडेल बिरुद्ध नाराबाजी गरेका थिए । आन्दोलित विद्यार्थीहरुले शिक्षक पौडेलको को २७ प १९२१ नम्बरको मोटरसाइकलमा आगजनी समेत गरेका छन् ।
आज आइतवार बिहान १० बजे देखि तनावग्रस्त भएको बिद्यालय परिसरको स्थिति राति पौने ९ बजे नियन्त्रणमा आएको थियो । आरोपित पौडेल लेटाङ –३ घर भएका पौडेल सोही विद्यालयका निमावि तहका सामाजिक विषयका शिक्षक हुन् ।
