काठमाडौँ । प्रमुख प्रतिपक्षी दल एमालेले देशको अर्थव्यवस्था संकट उन्मुख भएको दाबी गरेको छ ।
आइतबार देशको अर्थव्यवस्था र गभर्गनरलाई निलम्बन गरेको विषयमा पार्टीको धारणा सार्वजनिक गर्दै एमालेले आफूले सत्ता छाडेको नौ महिनाको अवधिमै सरकारको गतल नीतिका कारण देश श्रीलंकाको बाटोमा उन्मुख भएको दाबी गरेको हो ।
एमालेका तीन पूर्व अर्थमन्त्रीहरु सुरेन्द्र पाण्डे, विष्णु पौडेल र युवराज खतिवडा तथा योजना आयोगका पूर्वउपाध्यक्ष पुष्प कँडेलले संयुक्त रुपमा पत्रकार सम्मेलन गरेर अर्थतन्त्रको अवस्थाबारे चिन्ता व्यक्त गरेको हो ।
पौडेलले भने, ‘सरकारको गलत अर्थनीतिका कारण नौ महिनामै देशको अर्थव्यवस्था अवस्था नाजुक बन्न पुग्यो । अर्थतन्त्र जोखिम पूर्ण अवस्थामा पुगेको छ। सार्थक हस्तक्षेप भएन, समस्या समाधानका लागि पहल नगरेमा श्रीलंकाको अवस्थामा पुग्दछ ।’
अहिलेको सरकारले लिएको बाटोबाट स्वभाविक रुपमा श्रीलंकाको जस्तै अवस्थामा पुर्याउने भएकाले सच्चिन आवश्यक भएको बताए ।
‘एमालेले सरकार छाड्दा विदेशी मुद्राको स्थिति ११ महिनाका लागि पुग्ने थियो। हामीले ल्याइएको बजेटलाई निजी क्षेत्रले स्वागत गरेको थियो, लगानी कर्ता उत्साहित भएका थिए, पौडेलले भने, ‘हिजो र आजको अवस्थाबारे समीक्षा हुन आवश्यक छ ।’
एमालेले सरकार चलाउँदा सात प्रतिशत भएको तर अहिले कोरोना नियन्त्रण भइसक्दा पनि देशको अर्थव्यवस्था थप जोखिममा पुगेको उनेको दाबी थियो ।
