धरान । आसन्न स्थानीय तहको निर्वाचनका लागि गठबन्धनका तर्फबाट नेपाली कांग्रेसका नेता किशोर राईले धरानको मेयर पदका लागि उमेद्वारी दर्ता गराएका छन् ।
कांग्रेसबाट मेयरका आकांक्षी रहेका नेता सुजेन्द्र तामाङ प्रस्तावक रहेकामा अर्का युवा नेता सागर प्रसाईं राईको समर्थक बनेका थिए ।
संस्थापन पक्षका नेता राईले धरानको मेयरका लागि कांग्रेसका प्रदेश १ महामन्त्री उमेश थापा, मेयर तिलक राई र क्षेत्रीय सभापति सुजेन्द्र तामाङलाई उछिनेर मेयरका उमेद्वार बनेका हुन् । केन्द्रले भने प्रदेशलाई नै निर्णय गर्ने अधिकार दिएपछि आइतवारदेखि निरन्तर छलफल भएकोमा सोमवार अपरान्ह उनको नाम सिफारिस भएको थियो ।
धरानमा गठबन्धनबाट मेयरको प्रतिस्पर्धामा रहेका राईले धरानको साख र गौरबलाई माथि उठाउँदै नमुना शहर बनाउन आफुले उमेद्वारी दिएको बताए ।
उनले नीतिसञ्चारसंग भने, ‘धरानका जनताको दु:ख, पिडा मैले महसुस गएको छु । धरानको खानेपानीको अभाव देखि रोजगारीको समस्या, सुकुम्बासीका समस्या सबै राम्रोसँग बुझेको छु । धराने जनताका दु:ख, पिडा र समस्यालाई हल गरेर जनताको मुहारमा खुसी देख्नु नै मेरो ध्येय हो ।’
राईले आफूलाई मेयराको रुपमा एक पटक काम गर्ने मौका दिन पनि धराने जनतासँग आग्रह गरेका छन् । धरानमा मौलाउँदै गएको लागूऔषध दुर्व्यसन, भ्रष्टाचार, अराजकता र अनियमिततालाई नियन्त्रण गर्ने बताउँदै स्थानीय सरकार प्रतिको धरानबासीको विश्वास र भरोसालाई बढाउँदै जाने बताए ।
धरान र धराने जनताको पिडा र ब्यथा आफुले राम्रोसंग बुझेको बताउँदै राईले धराने जनताको सेवामामा आफु अहोरात्र खट्नेमा शंका नगर्न आग्रह समेत गरे ।
उनले धरानलाई मिनी हंगकंग बनाउनका साथै आफू फुटबल प्रेमी भएकाले धरानलाई पनि फुटबलमय बनाउने आफ्नो लक्ष रहेको जानकारी दिए ।
राई नेपाली कांग्रेसका हाल जिल्ला सदस्य छन् भने धरानको पुर्वनगर सभापति पनि हुन् । उनी अखिल नेपाल फुटबल संघको प्रदेश १ अध्यक्ष पनि हुन् । धरान सबै समुदाय र उमेर समुहका जनतामाझ लोकप्रिय रहेका उनि युवामाझ अझै बढी लोकप्रिय मानिन्छन् ।
धरानमा सत्तारुढ दलहरु कांग्रेस, माओवादी केन्द्र र नेकपा एकीकृत समाजवादीले मेयर, उपमेयरमा गठबन्धन गरेका छन् । वडाहरुमा भने आ-आफ्नो उम्मेद्वार उठाएर मैत्रीपुर्ण प्रतिस्पर्धा गर्ने सहमति भएको छ ।
#किशोरराई #धरान #कांग्रेस
