काठमाडौं । पारदर्शी रुपले दार्चुला घटनाको छानबिन गर्न गठित छानबिन समितिको टोली दार्चुला गएको छ ।
गृह मन्त्रालय श्राेतका अनुसार मन्त्रालयका सहसचिव जनार्दन गौतम नेतृत्वको टोली आज बिहान भारतीय बाटो हुँदैं स्थलगत अध्ययनका लागि गस्कु गएको हो ।
दार्चुलाको व्यास गाउँपालिका-२ का जयसिंह धामी महाकाली नदीमा बेपत्ता भएको घटनाबारे छानबिन गर्न गौतमको नेतृत्वमा टोली गठन गरेको थियो ।
घटनाबारे छानविन गर्न काठमाडौंबाट मंगलबार दार्चुला पुगेको मन्त्रालयको टोलीले बुधबार पत्रकारसँग घटनाको विषयमा छलफल गरेको थियो ।
छानविनका लागी आवश्यक सूचना तथा प्रमाण संकलन गर्न घटना स्थल जानु पूर्व टोलीले पत्रकार, मानव अधिकारकर्मी, राजनीतिक दल र ब्याँस गाउँपालिकाका जनप्रतिनिधिहरुसँग छलफल गरेको हो ।
छलफलमा समितिका संयोजक गौतमले घटनालाई नजिकबाट अनुसन्धान गरी छानविन गरिने बताउनु भएको छ । टोलीले यसअघि बुधबार बिहान घटनाका तीन जना प्रत्यक्षदर्शीलाई घटनाको बारेमा सोधपुछ गरेको छ ।
उक्त घटनाका प्रत्यक्षदर्शी कल्यान सिंह धामी, अनिता धामी र विक्रम सिंह रङकोलीलाई टोलीले घटनाको वास्तविकता बारे सोधपुछ गरेको छ ।
घटनासँग सम्बन्धित प्रमाणहरु संकलन तथा विश्लेषण गरी सत्य तथ्य बाहिर ल्याउने संयोजक गौतमले बताउनुभयो ।
अनुसन्धानको क्षेत्रमा निकै लामो समय काम गरेका सुरक्षाकर्मी छानविन समितिमा रहेको भन्दै उहाँले घटनाको सत्य तथ्य बाहिर आउनेमा विश्वास व्यक्त गर्नुभयो ।
ब्याँस गाउँपालिका–२ का जयसिंह धामीले तुइन तर्ने क्रममा भारतीय सुरक्षाकर्मीले तुइनको डोरी किटिदा महाकाली नदीमा खसेर बेपत्ता भएका थिए ।
