विराटनगर । देशभर बढ्दै गएको डेंगी रोग र जापानिज इन्सेफ्लाइटिस रोगको प्रभाव प्रदेश १ मा समेत देखिन थालेको छ । प्रदेश १ मा लामखुट्टेबाट सर्ने डेंगी रोग र जापानिज इन्सेफ्लाइटिसका बिरामीको संख्या बढ्दै गएको पाईएको हो ।
प्रदेश १ का विभिन्न जिल्लामा हालसम्म २ सय २१ जना डेंगीका बिरामी भेटिएका छन् । प्रदेशका स्वास्थ्यमन्त्री जयराय यादवका अनुसार जिल्लाका अस्पताल तथा स्वास्थ्य निकायलाई सचेत र सतर्क रहनका लागि निर्देशन भइसकेको जानकारी दिए ।
लामखुट्टेबाट सर्ने डेंगीबाट जोगिन अपिल गर्दै उनले प्रदेशका विभिन्न स्वास्थ्य निकायलाई आवश्यक सामाग्री, किट उपलब्ध गराउन थालिएको जानकारी दिए। उनका अनुसार डेंगीसँगै जापानिज इन्सेफ्लाइटिसका बिरामीको संख्या १० जना पुगेको छ । प्रदेशका विभिन्न स्थानमा शंकास्पद ६७ बिरामीको परीक्षण गर्दा १० जनामा सो रोग पुष्टि भएको हो ।
प्रदेशको पहाडी क्षेत्र तेह्रथुममा हालसम्म ८८ जनामा डेंगी पुष्टि भएको छ । तेह्रथुमको फेदाप र म्याङलुङमा डेंगीका बिरामी देखिएका छन् ।
त्यसैगरि, संखुवासभाको बाक्लो बस्ती भएका शहरमा ५७ जनामा डेंगी देखिएको छ । भोजपुरमा समेत १५ जनामा डेंगी पुष्टि भएको छ। मन्त्रालयले ताप्लेजुङ र पाँचथरमा १–१ जनामा डेंगी पुष्टि भएको जनाएको छ ।
प्रदेशमा माघ ८ गते मोरङमा दुई जनामा पहिलो पटक डेंगी पुष्टि भएको थियो । त्यसयता रोकथाम र नियन्त्रणमा काम गर्दै आएको मन्त्रालयले जनाएको छ ।
मन्त्रालयले भदौ ६ गतेसम्म प्रदेशका विभिन्न स्थानमा १ सय ६७ जनामा डेंगीका बिरामी उपचारमा रहेको जानकारी दिएको छ ।
विराटनगरको कोशी अस्पतालका निमित्त मेडिकल सुप्रिटेण्डेन्ट डा. लक्ष्मीनारायण यादवका अनुसार दुई जना डेंगुका बिरामी उपचारमा रहेका छन् । ज्वरोका कारण उपचारका लागि अस्पताल पुगेका १० जनामा परिक्षण गर्दा दुई जना पुरुषमा पुष्टि भएको डा. यादवको भनाइ छ ।
प्रदेश सरकार स्वास्थ्य मन्त्रालयका अनुसार स्थानीय तह र आफ्नो स्वास्थ्य निकायमार्फत उपचारदेखि सूचनात्मक कार्यक्रमलाई तिव्रता दिन आग्रह गरेको छ ।
मन्त्रालयले घर वरिपरि फोहर पानी जम्न नदिन, झाडी जंगल सफा बनाउन, घरभित्र झुल राखेर सुत्न तथा लामखुट्टे नियन्त्रणका लागि औषधि छर्कन अपिलसमेत गरेको छ ।
