बुटवल ७ भदौ । एमालेले लुम्बिनी प्रदेशसभाको बैठक अवरोध गर्ने भएको छ । सोमबार दिउँसो बस्ने बैठकमा अवरोध गर्ने तयारी एमालेले गरेको हो ।
एमालेले दुईजना सांसदलाई कारबाही नगर्दासम्म संसद चल्न नदिने चेतावनी दिँदै आएको छ । उसले आफ्ना सांसदलाई कारवाही गरेको पत्र टाँस गरी पदमुक्त गर्न माग गर्दै साेमबार सभामुुख पूर्णबहादुर घर्तीलाई निवेदन दिएको छ । सभामुखले नैतिक आचरण नदेखाएको भन्दै एमालेले पत्रकार सम्मेलनमार्फत पदमा नबस्नसमेत चेतावनी दिएको थियो ।
एमालेले सांसद अजय शाही र विमलाकुमारी वलीलाई पदमुक्त नगर्दासम्म सदन चल्न नदिने जनाइसकेको छ । यसअघिका दुईवटा बैठक एमालेकै अवरोधका कारण स्थगित भएका थिए ।
एमालेकै अवरोधका कारण बैठक पनि कार्यसूचीमा प्रवेश गर्ने सम्भावना न्यून छ । तर, सत्तासीन दलहरुले भने बैठक चलाउन दबाब दिएका छन् । चालू प्रदेश सभाको नवौं अधिवेशनका बैठक चल्न नदिएपछि नवनियुक्त मुख्यमन्त्री कुलप्रसाद केसीले विश्वासको मत लिन पाएका छैनन् ।
एमाले संसदीय दलका प्रमुख सचेतक भूमिश्वर ढकालले शाही र वलीलाई पदमुक्त गरेको सूचना सभामुखले नदिएसम्म संसद् अवरुद्ध गर्ने जानकारी दिए ।