इलाम। इलाम नगरपालिका १० गोदकमा रहेका पूर्ण स्मारका मावि र नन्द माविका बिधार्थीहरुका लागि सञ्चालित दशदिने स्टिम कार्याशालाको समापन भएको छ । विज्ञान प्रदर्शनी सम्वन्धि कार्यक्रममा ग्रिड भिल कार्यक्रम अन्तरगत काठमाडौं विश्वविद्यालयका इन्जीनियरहरुले सहजीकरणमा भएको कार्यशालाको समापन गरिएको हो ।इलाम नगरपालिका १० गोदकको वडा शिक्षा समितीले आयोजना गरेको कार्यशालामा बिज्ञान सम्वन्धि ज्ञान दिलाइएको थियो ।तालिम पछि सहभागीपुर्ण स्मारक माबि र नन्द माबिका विद्यार्थीहरुले विभिन्न प्रकारका उपकरणहरु समेत निर्माण गर्न सक्ने भएका छन् । उनीहरुले हाइड्रो इलेक्ट्रिक प्रोजेक्ट, टर्बाइन इलेक्ट्रिक प्रोजेक्ट, पानी जहाज लगायतका उपकरण निर्माण समेत गरेका छन् । निर्माण भएका सामाग्रीको समापनको अवसरमा प्रदर्शनी समेत गरिएको सचिव रविन्द्र घिमिरेले जानकारी दिए ।
वडा शिक्षा समितिका अध्यक्ष तथा वडा अध्यक्ष ओमनाथ प्रधानको अध्यक्षतामा सम्पन्न कार्यक्रममा वडा सदस्य, शिक्षा समितिका सदस्य तथा सम्वन्धित विद्यालयका शिक्षक एवम् विद्यार्थीहरुको सहभागिता रहेको थियो ।सहजकर्ता एवम् इन्जिनियर असिम जोशीले आफ्नो जन्मथलो, आफुले अध्ययन गरेको विद्यालयमा आएर आफुले जानेको ज्ञान सिकाउन पाउँदा खुशी लागेको बताए । उनले किताबमा सिकेको कुरालाई व्यवहारमा लागू गराएर देखाउन पाएको समेत बताएका थिए ।
त्यस्तै नन्द माबिका प्रधानाध्यापक उमेश बुढाथोकीले विद्यार्थीहरुले सिकेको कुरालाई ब्यवहारमा उतार्न समेत प्रोत्साहन गर्नुपर्ने बताएका थिए ।पुर्ण स्मारक माबिका प्रधानाध्यापक प्रेमप्रसाद घिमिरेले सानैदेखी विद्यार्थीलाई प्राविधिक ज्ञान जगाइदिनाले भोलीका दिनमा अझ उत्सुकता बढ्ने र सो सम्वन्धि नै खोज गर्न सक्ने बताए ।नेपाल रेडक्रस सोसाइटी कोशी प्रदेश युथ सरकलको परिचालन समिति सदस्य निश्कल राईले यस्तो उत्कृष्ट कार्यक्रम वडामा संचालन गर्नु गौरवको काम भएको बताए । भोलीका दिनमा समेत शिक्षा समिति विद्यालयको शिक्षा सुधारको क्षेत्रमा निरन्तर लाग्नेमा आफू विश्वस्त रहेको बताएका थिए ।
जनताको नजिकको सरकार भएर पनि सिमित श्रोत र साधनलाई प्रयोग गरेर अघि बढ्नु पर्ने बाध्यताका कारण केही कामहरु माथिल्लो निकायबाट गराउन आफु लागेको उनको भनाई छ ।वडालाई समृद्ध बनाउन संघिय, प्रदेश र नगरपालिका लाग्नु पर्ने उनको सुझाव समेत छ ।
