इटहरी । इटहरी उपमहानगरपालिकाले इटहरीका संस्थागत विद्यालयमा कार्यरत शिक्षकहरूको शैक्षिक विवरण, नियुक्ति पत्र लगायतका कागजात ७ दिन भित्र बुझाउनका लागि आज उपमहानगरपालिकाले उर्दी जारी गरेको छ ।
उपमहानगरले निजी विद्यालयमा कार्यरत कर्मचारी तथा शिक्षकहरूको नियुक्ति पत्र, अध्यापन अनुमति पत्र, प्रअ नियुक्तिको पत्र र शैक्षिक योग्यताको विवरण माग गरेको हो ।
निजी स्कुलहरूले आफ्नो स्कुलमा कार्यरत शिक्षकहरूलाई नियुक्ति पत्र नदिएको, सरकारले तोकेको पारिश्रमिक नदिएको गुनासो बढेको भन्दै उपमहानगरले परिपत्र गरेको जनाएको छ ।
शिक्षा युवा तथा खेलकुद शाखाले ७ दिन भित्र विवरण उपलब्ध गराउन पत्राचार गरेको हो । शिक्षक(शिक्षिकाहरुलाई अनिवार्य सरकारले तोकेको मापदण्ड अनुसार तलब दिनु पर्ने र बुझाएको विवरण समेत माग गरिएको शिक्षा युवा तथा खेलकुद शाखाका प्रमुख द्रोण प्रसाद दाहालले बताए ।
