इलाम। माईजोगमाई गाउँपालिका स्थित अमर कल्याण माविमा अध्ययनरत विद्यार्थी राज भट्टराईले हालै प्रकाशित एसईई परीक्षामा इलाम जिल्लाको सामुदायिक विद्यालयतर्फबाट प्रथम स्थान हासिल गरेका छन्। उनले ३.८६ जीपीए ल्याएर उत्कृष्ट बनेका हुन हुन्।
राजको शैक्षिक उपलब्धिलाई कदर गर्दै काठमाडौँस्थित एम्बेसी कलेजले उनलाई आवाससहित पूर्ण छात्रवृत्तिको व्यवस्था गरेको छ। तर, उनको कमजोर आर्थिक अवस्थाका कारण केही व्यवस्थापनमा चुनौती आएको थियो।
यस परिस्थितिलाई मध्यनजर गर्दै माईजोगमाईका समाजसेवी आङ पासाङ शेर्पा र रोशन चाम्लिङको पहलमा सहयोग संकलन अभियान सञ्चालन गरिएको थियो। उक्त अभियानबाट संकलन गरिएको रकम र बिधालय परिवार बाट संकलन गरिएको रकम गरि जम्मा रु। ३३ हजार ४ सय५० रकम राज भट्टराईको परिवारलाई आज एक कार्यक्रमकाबीच हस्तान्तरण गरिएको छ।
कार्यक्रममा अमर कल्याण माविका प्रधानाध्यापक धन बहादुर भण्डारीले राजको शैक्षिक सफलताप्रति बधाई ज्ञापन गर्दै भने, “उहाँ यहि गतिमा अघि बढेमा भविष्यमा नेपालको एक प्रतिष्ठित व्यक्तित्व बन्न सक्ने र माईजोगमाईको शिर गर्वले उच्च बनाउने विश्वास लिएको छु।” यस्तै, समाजसेवी आङ पासाङ शेर्पाले आर्थिक अवस्था कमजोर भए पनि यस्ता प्रतिभावान विद्यार्थीको साथ दिनु सबैको दायित्व भएको बताउँदै आफू सधैं यस्ता प्रयासमा सहकार्य गर्न तयार रहेको जनाए। साथै, उनले अन्य शुभेच्छुक र दाताहरुलाई पनि यस्ता प्रयासमा सहभागी हुन आग्रह गरे। राज भट्टराईको यो सफलता माईजोगमाई गाउँपालिकाका सामुदायिक विद्यालयका लागि प्रेरणादायी उदाहरण बन्न पुगेको छ।
