विराटनगर । नेपाली कांग्रेसको १४ औं महाधिवेशन अन्तर्गत प्रदेश एकको सभापति पदमा संस्थापन इतर पक्षबाट प्रदेश सभा एकमा कांग्रेस संसदीयदलको नेता समेत रहेका राजीव कोइरालाले टिकट पाउने सम्भावना बढेको छ ।
कांग्रेस संस्थापन इतर पक्षका एक नेताका अनुसार कोइराला पक्षबाट प्रदेश एकको सभापतिको उमेद्वारमा कोइरालाको सम्भावना बढेर गएको हो ।
संस्थापन पक्षले बुधवार राति नै उमेद्वारको टुंगो लगाईसकेको छ भने इतर पक्षमा भने अहिलेसम्म उमेद्वारको टुंगो लागेको छैन । उमेद्वारको टुंगो लगाउन संस्थापन इतर पक्षका नेताहरु महेश आचार्य, डा. शेखर कोइराला, मिनेन्द्र रिजाल लगायतका नेताहरुको बैठक विराटनगरमा बसिरहेको छ ।
एक कांग्रेस नेताका अनुसार उनीहरुमध्ये को उम्मेदवार बन्ने विवाद जस्तो देखिएपनि उमेद्वार घोषणा गर्ने समय नजिकिंदै गर्दा कोइरालाले टिकट पाउने सम्भावना बढेर गएको छ । नाम उल्लेख नगर्ने सर्तमा उनले भने, ‘गुरुराज घिमिरेलाई केन्द्रिय सदस्यको उमेद्वार बनाउने र राजीव कोइरालालाई प्रदेश सभापतिको टिकट दिने सम्भावना हुनसक्छ ।’
नेता राजीव कोइराला र पार्टी केन्द्रीय सदस्य तथा नेपाल विद्यार्थी संघका पुर्व केन्द्रीय सभापति गुरुराज घिमिरे आकांक्षी रहेकोमा घिमिरे आफैं उमेद्वार छनौट समितिमा छन् ।
टिकटको दौडमा रहेका नेता कोइरालालाई टिकटको विषयमा जिज्ञासा राख्दा उनले यस बिषयमा नेताहरु बीच विराटनगरमा छलफल भइरहेको र आफुले समेत उक्त विषयमा बैठक पछि मात्र भन्न सक्ने बताए । उनले भने, ‘आज बेलुका सम्ममा उम्मेदवार फाइनल हुन्छ । बैठक पछिमात्र केहि भन्न सकिन्छ । धैर्य गरौँ ।’
कांग्रेसको प्रथम प्रदेश १ समितिको अधिवेशन आज विहीबार प्रदेश १ को राजधानी बिराटनगरमा सुरु भएको छ । भोलि शुक्रबार मतदाता नामावली प्रकाशन हुने र शनिबार चुनाव हुने तयारी छ ।
उक्त पदका लागि संस्थापन पक्षबाट उद्दव थापा उम्मेदवार बन्ने तय भएको छ । सभापति तथा प्रधानमन्त्री शेरबहादुर देउवा र नेता कृष्णप्रसाद सिटाैलाका साझा उम्मेदवारका रूपमा थापालाई अगाडि सारिएको छ । थापा नेपाली कांग्रेस झापाका निवर्तमान सभापति हुन् ।
