इटहरी । प्रदेशसभा १ मा नेपाली कांग्रेस संसदीय दलका नेता राजीव कोइरालाले अन्तराष्ट्रिय नारी दिवसको उपलक्ष्यमा शुभकामना संदेश दिएका छन् ।
अन्तराष्ट्रिय नारी दिवसको अवसरमा शुभकामना ब्यक्त गर्दै नेता कोइरालाले महिलाका हक, अधिकार र न्याय सुनिश्चित गर्न योगदान गर्ने तथा जीवन समर्पण गर्ने महिला योद्धाहरूलाई विशेष सम्मानका व्यक्त गरेका हुन् ।
‘सामाजिक न्याय र लैङ्गिक समानता : दीगो विकासको सुनिश्चितता’ भन्ने राष्ट्रिय नाराका साथ मंगलबार मनाइँदै गरेको ११२ औँ अन्तर्राष्ट्रिय महिला दिवसका अवसरमा सबैमा शुभकामना व्यक्त गरेका छन् ।
संविधानले महिलाको हकलाई मौलिक हकका रूपमा स्थापित गरी महिलालाई लैङ्गिक भेदभावविना समान वंशीय हक, सुरक्षित मातृत्व र प्रजननसम्बन्धी हक, पैतृक सम्पत्तिलगायत सबै विषयमा समान हक आदिको प्रत्याभूति गरेको बताउँदै कोइरालाले राज्यका सबै निकायमा महिलाहरूको समानुपातिक समावेशितालाई सुनिश्चित गरिएको स्मरण गरेका छन् ।
त्यसैगरी, नेपाली कांग्रेस प्रदेश सभा १ की सदस्य नवोदिता चौधरीले नारी दिवसको अवसरमा शुभकामना ब्यक्त गर्दै सम्पूर्ण नेपाली दिदीबहिनी, महिला अधिकारकर्मीलगायत महिला हक, अधिकारको संरक्षण र प्रवद्र्धनका क्षेत्रमा कार्य गर्नुहुने सम्पूर्ण व्यक्ति तथा सङ्घसंस्थाहरूमा शुभकामना व्यक्त गरेकी छन् ।
महिलालाई सामाजिक, राजनीतिक, सांस्कृतिक र आर्थिक अवसरहरूमा विना कुनै भेदभाव समान अवसर उपलब्ध गराउन र लैङ्गिक समानताको बाटोमा अघि बढ्न आजको दिनले सबैलाई उत्प्रेरित गर्दै आएको चौधरीले बताएकी छन्।
नारी मुक्ति आन्दोलनका अभियन्ताहरूको पहलमा सन् १९१० को मार्च ८ मा महिला कामदारमाथि भएको श्रम शोषणविरुद्ध आवाज उठाएको दिनको स्मरण गर्न तथा महिला हक अधिकार स्थापित गर्न सङ्घर्ष सुरु गरेको दिनका रूपमा विश्वभर अन्तर्राष्ट्रिय महिला दिवस मनाउने गरिएको छ ।
