काठमाडौं, ३१ जेठ । नेपाली कांग्रेसका तर्फबाट बाग्मती प्रदेश सभा सदस्य नरोत्तम बैद्यले आफूविरुद्ध फौजदारी कसुरमा मुद्दा दर्ता गरिएपछि मिडिया तथा सार्वजनिक रुपमा नबोल्ने बताएका छन्।
हिजो आइतबार नेकपा एमालेका कार्यकर्ताले जिल्ला प्रहरी कार्यालय मकवानपुरमा पुगेर सांसद बैद्यविरुद्ध मुद्दा दर्ता गरेपछि प्रदेशसभा सदस्य बैद्यले सो प्रतिक्रिया दिएका हुन्। बैद्यले आफूविरुद्ध मुद्दा दर्ता भैसकेकोले अब मुद्दा किनारा नलागेसम्म मिडियामा नबोल्ने बताएका हुन्। उनले भने, ‘मविरुद्ध मुद्दा दर्ता भैसकेको छ। म यो मुद्दा किनारा नलागेसम्म बोल्दिन्।’
एमाले नेता तथा कार्यकर्ताहरुले सांसद बैद्यलाई तत्काल पक्राउ गर्न प्रधानमन्त्री केपी शर्मा ओलीलाई दबाब दिएका थिए। गत शुक्रबारको प्रदेश सभा बैठकमा उनले प्रधानमन्त्री ओलीविरुद्ध आफू नाथुराम गोड्से बन्न तयार रहेको अभिव्यक्ति दिएका थिए।
तर, चौतर्फी विरोध र पार्टीबाटै तत्काल आत्मालोचना गर्न निर्देशन दिएपछि गत शनिबार प्रदेशसभा बैठकमा माफी माग्दै उनले उक्त शब्द फिर्ता लिएको घोषणा गरेका थिए।
के छ कानुनी व्यवस्था ?
संविधानको धारा १८७ (१) मा प्रदेशसभाभित्र पूर्ण वाक स्वतन्त्रताको हक हुने सुनिश्चित गर्न व्यक्त विचारलाई लिएर कुनै सदस्यलाई पक्राउ गर्ने, थुनामा राख्ने वा अदालतमा कारबाही चलाउन पाइँदैन भन्ने उल्लेख छ।
संविधानको उक्त धारामा लेखिएको छ, ‘यस संविधानको अधीनमा रही प्रदेशसभामा पूर्ण वाक स्वतन्त्रता रहनेछ र प्रदेश सभामा व्यक्त गरेको कुनै कुरा वा दिएको कुनै मतलाई लिएर कुनै पनि सदस्यलाई पक्राउ गर्ने, थुनामा राख्ने वा निज उपर कुनै अदालतमा काबारही चलाइने छैन।’
यदि कुनै सदस्यले सीमा बाहिर गएर गतिविधि गरेमा कारबाही गर्ने अधिकार सभामुखलाई मात्रै हुने व्यवस्था संविधानले गरेको छ।
प्रदेशसभाको निर्णयबाट त्यस्ता सदस्यलाई सचेत गराउने, नसिहत दिन वा तीन महिना नबढ्ने गरी कैद गर्न वा दश हजारसम्म जरिवाना गर्न अधिकार सभामुखलाई मात्र छ।
