काठमाडौं २७ साउन । लुम्बिनी प्रदेशका मुख्यमन्त्री शंकर पोखरेल माथि अविश्वास प्रस्ताव आएपछि मन्त्री शंकरले राजीनामा दिएका छन् । राजीनामा बुझाउनका लागि मुख्यमन्त्री पोखरेलले अहिले प्रदेश प्रमुख अमिक शेरचनको कार्यलयमा रहेको एमाले प्रदेशसभा गएको भूमिश्वर ढकालले जानकारी दिए ।
मुख्यमन्त्रीको राजीनामाबारे केहीबेरमा पत्रकार सम्मेलन गरेर जानकारी गराउन लागेको सरकारका प्रवक्ता बैजनाथ चौधरीले जानकारी गराए । लुम्बिनी प्रदेशको विशेष अधिवेशन आज दिउँसो १ बजेका लागि बोलाईएको छ । अधिवेशनमा मुख्यमन्त्री शंकर पोखरेल विरुद्धको अविश्वास प्रस्तावमाथि छलफल हुनेछ ।
विपक्षी दलहरूले मुख्यमन्त्री पोखरेलविरुद्ध साउन १८ गते प्रदेश सभा सचिवालयमा अविश्वास प्रस्ताव दर्ता गरिसकेका थिए । विपक्षी गठबन्धनले बुधबार नै सबै टुंग्याउने तयारी गरेको गरिरहेको छ । सत्ता पक्ष भने सर्वोच्चको आदेश नआएपछि अलमलमै परेको थियो । सर्वोच्च अदालतमा बिशेष अधिवेशन रोक्न माग गरेको रिटमाथिको सुनुवाई जारी छ ।
८७ सदस्य रहेको लुम्बिनी प्रदेशमा कारबाही र राजीनामा प्रकरणपछि ८० सदस्यमात्र छन् । बहुमतका लागि ४१ सदस्य आवश्यक पर्छ । विपक्षी गठबन्धनमा कांग्रेसका १९, माओवादीका सभामुखसहित १९, जनता समाजवादीका ३ र जनमोर्चाका १ गरी ४२ सदस्य छन् । सत्ता पक्षमा एमालेका ३८ जना मात्र छन् ।
यस्तै, प्रदेश सरकारका भौतिक पूर्वाधार विकास मन्त्री सन्तोष कुमार पाण्डेयले पदबाट राजीनामा दिएका छन् । मुख्यमन्त्री शंकर पोखरेलको नेतृत्वको सरकारमा सहभागी भएका मन्त्री पाण्डेयले मंगलबार राति राजीनामा दिएका हुन् ।
