एजेन्सी ३१ साउन । हाइटीमा ११ वर्षपछि शक्तिशाली भूकम्प गएको छ सो भूकम्पका कारण ३०४ जनाले ज्यान गुमाएका छन् भने भूकम्पमा परेर १८ सयजना भन्दा बढी घाइते भएका छन् ।
स्थानीय समय अनुसार शनिबार बिहान हाइटीको पश्चिमी क्षेत्र केन्द्रविन्दु भएर ७.२ म्याग्निच्युडको भूकम्प गएको थियो । भूकम्पका कारण सर्वसाधारणका घरसहित ठूलो व्यापारिक भवनहरु तथा चर्च एवम् होटलहरु पनि भत्किएका छन् ।
हाइटीका प्रधानमन्त्रील एक महिनाका लागि राष्ट्रिय आपतकाल घोषणा गरेका छन् । भूकम्पका कारण देशले धेरै क्षति ब्यहोरेको जानकारी पनि गराए ।
अमेरिकी जिओलोजिकल सर्वे (युएसजिएस) ले जनाएको अनुसार शनिबार सेन्ट लुइस डू सुड शहर भन्दा १२ किलोमिटर पर केन्द्रविन्दु भएर भूकम्प गएको थियो ।
भूकम्पको धक्का राजधानी पोर्ट–ओ–प्रिन्समा पनि महशुस गरिएको थियो । भूकम्पको केन्द्रविन्दुबाट राजधानी पोर्ट–ओ–प्रिन्स करिब १२५ किलोमिटर पर रहेको छ ।
यो भन्दा अगाडि सन् २०१० को जनवरी १२ मा हाइटीमा सात म्याग्निच्युडको भूकम्प गएको थियो । त्यसबेला भूकम्पमा परेर कम्तीमा एक लाख ६० हजार मानिसको ज्यान गएको थियो । अगाडिको भूकम्पाबाट उठ्दै गरेको हाइटीमा फेरि शक्तिशाली भूकम्प गएको हो ।
प्रधानमन्त्री एरियल हेनरीले उद्धार तथा राहतका लागि उद्धारकर्मीहरुको टिम खटाइएको बताएका छन् । भग्नावशेषमा फसेका वा पुरिएकाहरुको उद्धार अहिलेको प्राथमिकता रहेको उनले बताएका छन् ।
अमेरिकी राष्ट्रपति जो बाइडेनले भूकम्प प्रभावित हाइटीमा तत्काल सहयोगका लागि स्वीकृति प्रदान गरेका छन् । युएसएडले सहयोग गर्ने उनले उल्लेख गरेका छन् । हाइटीमा गएको भूकम्प र त्यसले गरेको क्षतिबाट आफू दुःखी भएको अमेरिकी राष्ट्रपति जो बाइडेनले बताएका छन् ।
युएसजिएसले भूकम्पका कारण हजारौँको मृत्यु भएको हुन सक्ने चेतावनी दिएको छ । अहिले पनि परकम्पहरु आउने क्रम जारी रहेकाले सतर्क रहन भनिएको छ ।
