तेह्रथुम ५ भदौ । बर्षाका कारण सडक अवरुद्ध हुँदा नागरिकले निकै सास्ती भोग्नु परेको छ । जिल्ला सदरमुकाम म्याङलुङ जोडिने एकमात्र मुख्य सडक बसन्तपुर–म्याङलुङ सडक यतिबेला अस्तब्यस्त बनेको छ ।
निमार्णधिन कालो पत्रे सडक निमार्ण कम्पनीले ढिलाई गर्दा नागरिकले सास्ती बेहोेर्नु परेको हो । सदरमुकामका साथै जिल्लाका ग्रामिण क्षेत्रका सडकहरुको अवस्था पनि अहिले बेहाल छ । सडक अवरुद्ध हुँदा सवारी साधान सञ्चालनमा समस्या भएको सवारी चालक पृतम सुन्दासले बताए । जिल्लाको पश्चिमी क्षेत्रमा रहेको छथर गाउँपालिकाको केन्द्र जोडिने सिधुवा–शुक्रबारे सडकको अवस्था पनि बेहाल नै छ ।
सडक अवरुद्ध हुँदा यहाँका स्थानीयहरुले उत्पादन गरेको कृषीजन्य सामग्री ढुवानीमासमेत निकै समस्या उत्पन्न भएको छ । बर्खाले सडक बगाउँदा एम्बुलेन्ससमेत सञ्चालनमा समस्या भएको स्थानीय नगेन्द्र भण्डारीले बताए ।
बर्खाका कारण बजार केन्द्रसमेत हिलाम्यै हुँदा नागरिकहरुलाई हिँडडुल गर्न निकै सकस भइरहेको छ । जिल्लाको प्रायसबै सडकहरु हिउँदमा धुलाम्य र बर्खामा हिलाम्यै हुन्छन् । कोरोनाका कारण स्थानीय बजारहरु नखुल्दा गाउँमा उत्पादन भएको कृषीजन्य सामग्री बिक्रीमासमेत समस्या उत्पन्न भएको छ ।
