काठमाडौं । नेपाली कांग्रेसको केन्द्रीय कार्यसम्पादन समितिको बैठक आइतबार बस्ने भएको छ ।
मुख्यसचिव कृष्णप्रसाद पौडेलका अनुसार आज आइतबार बिहान १० बजे पार्टी कार्यालय केन्द्रीय कार्यसम्पादन समिति बैठक बस्दैछ ।
बैठकमा बारा- २ मा हुने उपनिर्वाचनबारे छलफल हुनेछ। यसभन्दा अगाडि चैत १६ गते बसेकाे केन्द्रीय कार्यसम्पादन समितिकाे बैठकमा बारा-२ मा जनता समाजवादी पार्टीका अध्यक्ष उपेन्द्र यादवलाई समर्थन गर्ने कुरामा केही नेताले असन्तुष्टि जनाएका थिए।
कांग्रेसले चितवन २ मा जितनारायण श्रेष्ठ र तनहुँ १ मा गोविन्द भट्टराईलाई उम्मेदवार बनाउने निर्णय गरिसकेकाे छ।
यसैगरी, बैठकमा सरकारमा पठाउने मन्त्रीकाे बारेमा छलफल हुने बताइएकाे छ। भागबन्डामा ८ मन्त्रालय पाएकाे कांग्रेसले शुक्रबार ४ मन्त्रीलाई मात्रै शपथग्रहणमा पठाएको थियो। ४ मन्त्री छान्न बाँकी नै छ।
यस्तै, बैठकमा समसामयिक राजनीतिक विषयमा पनि छलफल गरिने मुख्यसचिव पाैडेलले जानकारी दिए।
