इटहरी । नेपाल प्रेस युनियन सुनसरी शाखा अन्तरगत इटहरी उपमहानगर समितिले ‘युथ कंग्रेस कन्क्लेभ’ कार्यक्रम आयोजना गर्ने भएको छ ।
आउदै गरेको स्थानिय निकायको चुनावलाई मध्यनजर गर्दै आयोजना हुन लागेको कार्यक्रममा नेपाली कांग्रेसका स्थानीय युवा नेताहरूको विचार, योजना र आवस्यक विषयवस्तु प्रस्तुत गरिने प्रेस युनियन इटहरी संयोजक विनय बाह्रकोटीले बताए ।
कार्यक्रम चैत १९ गते शनिवार इटहरीको दुर्गा पार्टी प्यालेसमा आयोजना हुने छ ।
दिउँसो १ बजेबाट सुरु हुने कार्यक्रममा सात वटा विषयमा यहाँका स्थानीय नेताहरूको प्रस्तुति हुनेछ । नेताहरूको लगाव र क्षमताको आधारमा बिषयबस्तु उपलब्ध गराइएको उनले बताए । प्रेस युनियन इटहरी सचीव मनोज दाहालका अनुसार इटहरी उपमहानगरपालिका भित्रको सरोकारका विषयमा युवा नेताहरूले रिपोर्ट प्रस्तुत गर्नेछन् ।
जसमा इटहरीको शैक्षिक उन्नयनको बिषयमा युवा नेता प्रदीप केसी, महिला तथा समावेशीताको सवालमा निर्मला चौधरी, प्रविधिमैत्री सहर विषयमा मन्दीप भट्टराई, आर्थिक समृद्विका आधारहरू विषयमा विक्रम घिमिरे, सामाजिक लोकतन्त्रका सवालहरू विषयमा सुबेक्छु देवान राई, व्यवस्थित स्वास्थ्य सेवा विषयमा सन्दीप पौडेल र कला साहित्यको विषयमा रङ्गकर्मी सोनु जयन्तीले रिपोर्ट प्रस्तुत गर्नेछन् ।
त्यससँगै इटहरीका २० वटै वडाका युवा नेताहरूले वडास्तरीय समस्या समेत राख्ने बताइएको छ । त्यसका निम्ति इटहरीका २० ओटा वडाका सभापतिहरुलाई आमन्त्रण गरिएको छ । प्रत्येक वडाबाट आएका रिपोर्ट र समस्या पहिचानको आधारमा इटहरी कांग्रेसबाट मेयरका दाबेदारहरूले आफ्नो योजनासहित भनाइ राख्ने कार्यक्रम रहेको सह संयोजक खेमराज सापकोटाले बाताए ।
